मारा हंसला रे चालो शिखरगढ़,
काया कोटड़ी में रंग लागो,
रंग लागो ज्याको भो भागो।।टेर।।
राम नाम को पीवो प्याला,
पीवत पीवत रंग लागो।
सुरत नीरत मल आई ठीकाणे,
अब काया में पीव जागो।।1।।
डांवी इंगला जीमणी पिंगला,
सुखमण के धोरे लागो।
त्रिवेणी का रंग महल में,
अजब जड़ाको अब लागो।।2।।
झरमर झरमर महीड़ो बरसे,
घरहर इन्दर गाजे।
मार हाथ बाबो चढ्यो शिखर में,
अणगड़ से बातां लागो।।3।।
धरण गगन बिच तपसीड़ो तापे,
वणी बाबाऊ मारो मन लागो।
मछन्दर प्रताप जती गोरख बोले,
भाग पुरबलो अब जागो।।4।।
आवे नहीं जावे मरे नहीं जन्मे,
नहीं धूप नहीं छाया,
ऐसा अणगड़ धाया।।टेर।।
माता नहीं जद जनम हमारा,
न कोई ओदर आया।
दाई मांई का काम नहीं रे,
न कोई जापा जणाया।।1।।
धरती नहीं जद धूणा हमारा,
बना अगनी तप लग्या।
हाड़ मांस बिना लिया लंगोटा,
बना नीर में न्हाया।।2।।
बिना गहरू में भंगवा रंगिया,
बन घर अलख जगाया।
बना जोली में सब जुग मांग्या,
बना भूख में खाया।।3।।
पग बना पंथ नेण बना नरखिया,
बना जीब्या गुण गाया।
नांवा में इक नाम नरमलो,
सतगरू मोह बताया।।4।।
माने मल्या मछन्दर जोगी,
भिन्न भिन्न कह समझाया।
कहे गोरखजी सुणो कबीरा,
आपू में आप समाया।।5।।
हरि भज हरि भज हीरा परखले,
समझ पकड़ नर मजबूती।
अष्ट कमल पर खेलो मेरे दाता,
और बातां सब झूठी।।टेर।।
घरहर घरहर मेहा बरसे,
सोहं सोहं क्या होती।
तरवेणी का रंग महल में,
हंसा चुग रिया निज मोती।।1।।
सत् समरण का सेल बणाले,
ढाल बणाले धीरज की।
काम क्रोध ने मार भगादे,
जद जाणू थारी रजपूती।।2।।
पांचों चोर बसे काया में,
जिनकी पकड़ो सिर चोटी।
पांचां ने मार पचीसा ने बश कर,
जद जाणू थारी बुध मोटी।।3।।
पकी धड़ी का ताल बणाले,
काण न राखे पाव रत्ती।
कहे मछन्दर सुण ले गोरख,
अलख लखे सो खरा जती।।4।।
बात करे बाणियो हुंकारो देवे कूण,
हुंकारो देवे कूण।।टेर।।
आंधो तो कीदी अरजी,
काण्यो छोड्या रूण।
सूजता तो सासे पडग्या,
मरग्या माथो धूण।।1।।
पांगले तो हिम्मत कीदी,
देवल दीदा चूण।
देवता का दरसण करता,
मरता जीवां जूण।।2।।
चोरां के तो खेती भायी,
लूले लीदी लूण है।
पोर बायी बाजरी,
लाटा लीदा कूण है।।3।।
सतगरू शरणे जावज्यो,
पूरा लीज्यो गूण।
गोरखनाथ जोगी बोलिया,
भरज्यो पूरा पूर है।।4।।
आत्म हो आप रूप धर आया।
सतगरू सिमरथ होय पार जद पाया।।टेर।।
है काया को रूप,रूप सब माया।
सतगरू मल्या जदी पार पाया।।1।।
प्रेम बना नहीं ढोड़ मारग अटकाया।
थक्या जो थर नहीं करम लटकाया।।2।।
धर्म बना नही ढोड़ मुक्त नही पाया।
भटक भटक मर जाय पार न आया।।3।।
मल्या मछन्द्रनाथ दर्शण वे पाया।
गरू चरणां में आय गोरख गुण गाया।।4।।
पांचो पांचो भाया की ,
एकन मण्डली ओ नाथ जी।
वे तो छटा छटा ,
श्री भगवान वो दीनानाथ ।।1।।
गोरख धन्धा जोग कमायो वो नाथ जी ।।टेर।।
दोराणिया जेठाणी ,
ननद भोजाई वो नाथजी।
वो तो चारां को एक ,
भरतार वो दीनानाथ ।।2।।
कुड़ा के किनारे गरू मारा ,
समन्द सुखाया वो जी ।
वो तो नाडूल्या राे छेय ,
न पार वो दीनानाथ ।।3।।
सुई का नांका में गरू मारा ,
हस्ती समाया वो जी ।
वे तो सुंगल्या पोल्या में नहीं ,
माया वो दीनानाथ ।।4।।
दोय कर जोड़,
जती गोरख बोल्या वो जी।
वे तो सत अमरापुर,
पाया वो दीनानाथ ।।5।।
गरू चरणां में आय होवे निवेड़ा।
टले जमा की मार ,
बचन सुण मेेेरा ।।टेर।।
हरदा कंवल के मांय ,
राम है मेरा ।
वहां जा प्रीत लगाय ,
मटे जम जेड़ा ।।1।।
गरू शबद परकाश ,
और अंधेरा ।
जहां शबद को आगे ,
मिले मले बहेरा ।।2।।
गरू बिना पावो नाय ,
करोजी हेरा ।
मन मुक्ति नहीं होय ,
मटे नहीं फेरा ।।3।।
पूरब पेला भाग ,
साईजी के नेड़ा ।
गावे गोरखनाथ ,
भजन कर हेरा ।।4।।
भाईड़ा भजलो राम गेला गम का।
झीणा झीणा जपना जाप ,
सरोदा सुन्न का हे वोजी ।।टेर।।
सिंवरू सारद माय बुद्धि दो दाता।
घट सिवरू हिंगलाज उगम की बातां ।।1।।
इला पिंगला सोध खेल सुखमण का ।
कुंभ कलश भर लाय मेट दी संका ।।2।।
तरबीणी तार लगाय तंदूरा तन का ।
वहां नरभे हो जाय मोरणा मन का ।।3।।
सोवनी शिखरगढ़ देख अणगड का।
इला पिंगला सोध खेल सुखमण का ।।4।।
गोरख जपिया जाप और कोई जपणा ।
अन्त समय के मांय कोई नहीं अपना हे वोजी ।।5।।
सुर बिना पूंगे नाय मारग थक जाता।
सुर ने सिवरे सोई भाग से पाता हे वोजी।।टेर।।
कंठ कंवल के मांय सरस्वती माता।
वो आवे टकशाल भजन फल पाता ।।1।।
शिव शक्ति के हेत अमृत बरसाता।
पीवे भरला साद अमर हो जाता ।।2।।
नुगरा ने पीवे जहर जहर मर जाता।
करोड़ जतन कर देख मोक्ष नहीं पाता ।।3।।
मल्या मछन्द्रनाथ मारग बतलाता।
गावे गोरखनाथ भजन फरमाता हे वोजी ।।4।।
कहां से आवे बीज जांच कर वांका।
जैसी जूड़ी पाय संत सुर का हे वोजी।।टेर।।
षट् कंवल के मांय देख्या बन्का।
बारा बीज विचार खेल है वांका ।।1।।
लंग भंग के बीच रूप सांई का।
नुगरा जाणे नाय करम की संका ।।2।।
जैसी जूणी पाय मोडरिया अंका।
शशिया देव ने साज खेल आहंग का ।।3।।
गोरख करी अवाज आतृम कर अंका।
पड़े जमा की मार खोल दे संका ।।4।।
मैंने तेरे ही भरोसे हनुमान, सागर में नैया डार दई ।।टेर।। काहे की या नाव बनाई , काहे की पतवार। रामा काहे की लगा दी जंजी...
