चरखा रो भेद बतादे ये,
कातण वाली नार।।टेर।।
बेटी केवे बाप ने मारे,
अणजायो वर लाय।
अणजायो वर ना मिले तो,
थारो मारो ब्याव।।1।।
दोराणी घर माण्डो रचियो,
जेठयाणी घर ब्याव।
सगा देवर को ब्याव मंड्यो है,
नणदल फेरा खाय।।2।।
सासू मरजो ससूरो मरजो,
परण्योड़ो मर जाय।
खाती का बेटा थू मत मरजे,
चरखो दियो बणाय।।3।।
चरखो मारो रंग रंगीलो,
पूणी लाल गुलाल।
कातण वाली नार सुन्दरी,
लुल लुल गाले तार।।4।।
चरखो चरखो सब ही केवे,
चरखो लखियो न जाय।
चरखो लिखियो दास कबीरा,
आवागमन मिट जाय।।5।।
