थारी छोटोड़ी ऊमर में कई रंग,
लागो डाला बाई वो।
मत लो समाधि।।टेर।।
हथाया बैठोड़ा थारा,
ससुराजी बरजे।
मारा धोला रे साफा लज्या राखो,
डाला बाई ये।।1।।
रसोई बैठोड़ा थारा,
सासूजी बरजे।
मारा घूंघटिया लज्या थे राखो,
डाला बाई ये।।2।।
परगट जाती पणिहार्या,
थाने बरजे।
मारा भरयोड़ा बेवड़ला की जल्या राखो,
डाला बाई ये।।3।।
हरि शरणे भाटी हरजी गावे,
जनम जनम गुण गाऊ।
डाला बाई ये।।4।।
हंस चढ़ोजी बड़द सम्भालो,
जीव जलम का जामा।
संकट मेट सायबा मलज्यो,
महर करोजी समामा ।।1।।
उरा पधारो रामदेव जी बाबा,
नौ खण्ड पृथ्वी में नामा।
सबल धणी मारे लिख दो परवाणा,
रूजक बढ़ाओ धणी रामा ।।टेर।।
रमझम घोड़ला के नेवर बाजे,
दम दम घूरे दमामा।
असुरा ऊपर पीर कोपिया,
चढ़ आया हर रामा ।।2।।
अन धन लछमी आनन्द पूरज्यो,
दीज्यो खजानां मूं दामा।
रिद्धि सिद्धि का बासा पूरज्यो,
सनमुख राखज्यो समामा ।।3।।
गीत ग्रंथ अरथ ओर अक्षर,
नेकी का धरू कामा।
भला पुरूष का मेला कराज्यो,
अलगा राखज्यो अलामा ।।4।।
र रो रटू तो र व रंग लागे,
मम्मो मेट दे रामा।
हरजी केहवे मारो हेत धण्या में,
चरणां में सात सलामा ।।5।।
थोथी थलिया में थारो देवरो वो,
रूणेजा वाळा श्याम।
धजा रे फडूके असमान बाबा रे ।।टेेर।।
आंदला तो आवे थारे जातरी वो,
रूणेजा वाळा श्याम।
आंदला ने आंख्या दराय बाबा वो ।।1।।
पांगला तो आवे थारे जातरी वो,
रूणेजा वाळा श्याम।
पांगला ने पांव दराय बाबा वो ।।2।।
कोडिया तो आवे थारे जातरी वो,
रूणेजा वाळा श्याम।
कोडिया रा कोड जड़ाय बाबा वो ।।3।।
बांजडिया तो आवे थारे जातरी वो,
रूणेजा वाळा श्याम।
बांजडिया रे पालणा बंधाय बाबा वो ।।4।।
दुखिया तो आवे थारे जातरी वो,
रूणेजा वाळा श्याम।
दुखिया रा दुखड़ा मिटाय बाबा वो ।।5।।
भाटी हरजी की कीजो विणती वो,
रूणेजा वाळा श्याम।
जुग जुग चरणां में राख बाबा वो ।।6।।
राम के नाम बिना रे मूरख राम के नाम बिना रे, जल जइयो जिह्वा पापनी, राम के नाम बिना रे ।।टेर।। क्षत्रिय आन बिना, विप्र ज्ञाण बिना, भोजन मान ...
